故事（二）作為一位A仔的媽媽，有一個好現實的問題：「當我老了，他怎麼辦？」

作爲一位A仔嘅媽媽，我有好長時間都覺得佢係無辦法獨立，所以會幫佢打點晒一切。不過，有一個好現實嘅問題：「我可以照顧佢成世咩？我仲可以照顧到佢幾耐？？」所以，我開始去搵方法訓練囝囝嘅獨立能力。

火星學堂導師周Sir 俾咗一個新唧思考方向傅我：「你放個小朋友去中心最多咪幾個鐘，但係如果你學識點樣同囝囝溝通，你就可以喺屋企嘅每個細節到訓練囝囝獨立能力。」

如果只係依賴認卡或者獎賞訓練，A 仔只會識得好機械式咁樣同人講早晨，但係就唔識得睇人嘅眉頭眼額。火星學堂教我用「聯想詞彙」嘅方式向囝囝表達所需；就以洗衫為例子，以前我會直接同佢講開機洗衫，但係就無咩效果。

後來我學識到可以咁樣去表達：「咦，個洗衣籃就嚟嘔喇」又或者「個洗衣機好似無咩位喇」。用呢個方式同囝囝溝通一開始係困難嘅，但係日子有功，囝囝越來越識得去思考「開機洗衫」嘅原因而唔係只係聽指令咁樣去回應日常需要。

除咗用「聯想詞彙」嘅方式向囝囝表達所需，我都要學識俾佢自己承擔責任。

莫講話學校老師或者路人，就連我作爲一位A仔的媽媽，一開始都總係會對「特殊教育需要」嘅小朋友有個錯誤想法：「覺得佢地永遠都需要被照顧。」

火星學堂嘅家長基本上都抱持一個信念：「有時最阻礙佢成長嘅，係過份嘅保護。」保護係需要嘅，係愛嘅表現，但係過份嘅保護反而會令到佢失去咗成長嘅樂趣。

仍然都係用「開機洗衫」去做一個例子，除咗用暗示嘅方式對囝囝從旁引導，用「個洗衣籃就嚟嘔喇」代替「你需要洗衫喇」引發聯想外，我亦都試過狠心咁樣唔幫佢洗校服，等佢知道原來唔洗衫就會無校服著，由囝囝去了解一下無校服著嘅相關結果。

自此，我成日都會見到囝囝自動自覺開機洗衫，根本唔需要我哋幫忙同提醒。因為佢明白原理以及後果，而唔係只係聽指令去做事情。開頭一定係難，但係時間會令你見到小朋友嘅成長。而呢種成長，係需要我哋用不同方法引導佢哋思考，然後放手俾佢哋去試。